今日我希望就我一時嘅衝動再一次向所有受影響嘅人道歉，因為我唔識得處理壓力，唔識面對其他人嘅提問，從而失控，去講左D傷害到人，同令人難受嘅說話，為此我想借呢篇文去講一聲對唔住。

我一直都當咁多位觀眾係我朋友，可能投放得太多感情，有時忘記左自己喺一個公開嘅平台上講得太多，我會好好反省。我原意只係當同朋友傾計，而唔係希望大家知道D咩之後去攻擊任何人，當我知道有人會因為我講嘅說話，走去攻擊他人，仲要同番我講嘅時候，我就知我自己錯得好離譜，我真心希望大家唔好再因爲我而去散播仇恨，因為始終係我講太多，係我有錯在先。

同時，我希望大家如果見到其他人，因為我嘅言論，走去鬧事，攻擊別人的話，希望大家可以叫佢地收手，唔好再喺人地嘅地方攪事，互相指罵唔會幫到任何一方出氣，只會令雙方一直困係過去，走唔番出嚟。

有時候，放下仇恨會活得更自在，我都放下左喇，何況身為觀眾嘅大家，點解唔可以放低呢？

發生左嘅事，決定左嘅嘢，好多時都唔會改變到，我希望大家可以幫幫手，俾我或者其他人有一個重新開始嘅機會，就當俾個機會大家放低一直揹住嘅重擔重新出發，我會好感激大家。

最後，我會好好管理好我自己嘅情緒，同好好咁面對壓力，同埋為我嘅言論向大家講聲對唔住，再一次，我希望大家唔好再因爲是非去攻擊任何人，多謝。