「燈鄧鄧蹬等鄧鄧」

好感恩終於可以拍 TVB版本嘅「其實我不貪心」MV喇!好中意拍 MV﹐因為歌曲嘅意境一直都只係喺腦裡面﹐但藉著MV就可以從視覺上呈現出嚟!雖然都算幾早就開始拍個 MV﹐但我實在太興奮喇﹐居然完全無賴床囉 ! [自豪中...]當我知道仲可以一日走幾個 location拍﹐有日景﹐有夜景﹐又有屋景﹐我就更加 high爆啦!!!不過要喺咁多唔同地方拍﹐D工作人員一定好辛苦﹐當中有拍攝嘅﹐有打燈嘅﹐有負責道具嘅﹐有播音樂嘅﹐等等等等...又要 set up﹐又要收拾﹐足足忙咗一整日﹐真係要好好多謝你哋每一個!亦多謝 TVB安排咗石澳喱間咁靚嘅屋嚟拍﹐夜景就喺新天星碼頭取景!石澳喱間無敵海景嘅屋之前睇戲就見得多﹐真估唔到居然可以喺我有生之年能夠親身去到!我當然有把握機會影靚相﹐好好享受同親近一下大自然啦!講番個 MV﹐今次對我確實係一個幾新嘅嘗試﹐亦係一大考驗﹐因為身為一個演技經驗近乎零嘅我﹐除咗要拍攝唱歌部份之外﹐更被導演安排咗少少同女主角對手戲嘅部份...感激大家對我嘅包容﹐特別係導演 Eric同女主角 Cilla﹐希望之後繼續會有機會向你哋學習啦!仲有一場好值得一提﹐就係講我憂鬱彈琴喇!本身導演要求我跟音樂彈一段仔﹐但由於無譜﹐而我又好耐無掂過個琴﹐所以只能夠即場搵番 intro嗰幾粒音﹐[即係頭嗰兩句「燈鄧鄧蹬等鄧鄧 燈鄧鄧蹬凳鄧鄧」呀 !]但拍出嚟嘅效果應該會幾正!拍攝中途我見大家咁落力set up﹐我又有空檔嘅時間﹐就即席獻醜彈少少我首飲歌助下興添!首歌係日劇 With Love嘅"Once in a Blue Moon"﹐真係好耐無彈﹐所以彈到一岩一忽﹐希望下次有幾會再練返好成隻歌﹐有機會再表演比大家聽啦!總括嚟講﹐今次又係十萬個正嘅經驗﹐希望個 MV快 D有得睇啦 !

拍攝唱歌嘅部份之前﹐導演親身建議及示範走位和拍攝角度。

對住無敵大海景唱歌﹐感覺真係唔同D!

喱一幕導演拍攝我於女主角手上鏡中倒影﹐出嚟嘅感覺應該會幾特別。

與戲中男女演員阿東和Cilla合照。

與勞苦功高嘅導演Eric合照。

女主角剛被男朋友拋棄﹐而我這位暗戀者亦只能喺旁邊借出肩膊﹐作她的出氣袋。

「其實我不貪心」嘅 intro係由純鋼琴開始的﹐可能因為咁﹐導演就安排咗一場孤獨彈琴嘅戲。為配合歌曲嘅 mood﹐我亦要顯出越彈越無心機嘅感覺。

雖然從加拿大返港都已經有大半年時間﹐但新天星碼頭都係我嘅第一次嚟。