跳出框框

WOWOWOWOWOWOWOWOWOWOWOWOWOWOWOWOW!!!!終於好快就有機會拍我第一個廣告喇!!!今次仲唔係就咁拍咁簡單呀﹐條廣告音樂我都有份參與添呀!首先透露少少啦﹐喺個廣告音樂裡面我會show出我嘅看家本領﹐吹咗八年嘅長笛!

唔單止我呀﹐個廣告其實仲有幾個 version﹐其中一個就 feature一位好犀利嘅violinist!

而禮拜一晚我哋就一齊去咗studio錄音喇!演奏家果然係演奏家﹐一拎起個小提琴就自自然然人琴合一!佢仲 pro到帶備咗兩個唔同音質嘅琴﹐睇下邊隻音色錄起嚟適合D!

(umm..唔係普通兩支小提琴﹐係兩支「古董」小提琴﹐平嗰支都閒閒 哋幾十萬嗰D!)我坐喺隔離都唔敢坐太近[見圖 ]﹐嗰度絕對係個高危地帶!

跟住到我錄喇!今次係一個好膽戰心競嘅錄音經驗!除咗係因為第一次錄音唔係錄自己把聲之外﹐我仲要被監製對我作出前所未有嘅要求!

(放心﹐唔係無理要求﹐千其唔好留言鬧個監製呀!你睇埋落去先啦!)我原先已經預備好我要吹 D乜...但係為咗隻歌嘅效果﹐監製突然要求我即興吹 D嘢!

[個心寒一寒]雖然吹咗超過八年長笛﹐但係由頭到尾都係跟譜吹﹐我嘅能力係未到大師級咁可以話吹乜就吹乜!就喺我強烈兼不願意求情下﹐監製絕無讓步﹐仲話可以慢慢試﹐因為佢覺得只要隨心吹﹐最終總會「必」到一 D正嘢出嚟﹐佢對我有信心!卒之又真係比我嘔心瀝血咁嘔到D嘢出嚟喎!今次比我真係好大嘅領悟﹐有時真係唔好 set boundaries框住自己﹐要嘗試放膽相信自己...挑戰自己!唔好得個諗字﹐只要肯踏出第一步去試﹐奇跡係會發生架 !