蘋果日報 中環在線：朱太撈埋健身中心 鄧聲興范統做客仔 - 李華華

金利豐（1031）老闆朱李月華一向都係百足咁多爪，除咗老本行證券業務外，仲有名貴鐘錶同餐飲生意，最近佢仲涉足埋健身行業，跟佢下屬金利豐營運總監呂錦傑一齊投資一間叫Fight Factory Gym嘅武術健身中心，股評人鄧聲興同埋打開拳嘅百利保（617）董事范統都係客仔。 「蜘蛛女」有份投資 Fight Factory由世界級拳手「風之子」杜恆霖與「蜘蛛女」鄭麗莎等人創辦，其他董事包括麥家榮同黎彥亨，兩年前由樓上舖做到去中環開地舖，近日再喺銅鑼灣租咗兩層共7,000平方呎地方開旗艦店，並邀得朱太投資。

新舖前日正式開張，朱太坦言，佢一向都唔多做運動，但係見到班後生仔搞到間健身中心有聲有色，又有錢賺，於是決定投資少少，等佢哋呢盤生意可以再發大啲。聞說，朱太拎咗過千萬元出嚟投資。

朱太平時應酬多，佢都話?家好容易覺得攰同埋失眠，所以都會考慮下去gym房做下拉筋咁話。佢位公子朱俊浩平時都有做開gym，可惜最近打籃球嗰陣整親隻腳，?家仲打緊石膏，未可以做gym住。

叫黃德几keep吓 呢間健身中心原來有唔少財經人幫襯。出名鍾意打拳嘅范統一直有跟杜恆霖練拳，佢前日都有畀面到賀，又透露自己心思思想再比賽，只係?家好難搵到差唔多年紀嘅對手。

體重只得150磅嘅鄧聲興亦都係客仔，佢就話幫襯做gym唔係想減肥，主要係想操得硬淨啲啫。

至於朱太位「愛將」黃德几，朱太亦建議對方要考慮keep吓，但係轉頭就笑住話，黃德几?家都幾可愛。