Light My Fire

LIGHT MY FIRE自小不愛返學不喜讀書不“洩”學校制度不滿訓導老師不參加任何課外活動只愛留連機鋪波樓仲有…聽歌。還記得媽媽在我剛升讀中二的時候幸運地中咗次六合彩三獎，派彩近五萬。媽媽正宗開心到成個彈起之餘爭在未加屈體轉身三百六落地。當晚她心情大靚，於是我食住個勢膽粗粗同佢講：我想要一部hi fi呀阿媽。一首郭富城的《對你愛不完》為這部什廠hi fi開光灌頂勁爆數星期後我用唔食lunch死慳死抵餓著肚皮之方法買下生平第一盒卡式錄音帶-BEYOND的《永遠等待》。五個懐著理想，夢想的年青人穿針織上衣下襯短打站在夕陽下拍的封面照到現在依然記憶尤新，歷歷在目。全張專輯的歌曲更加百聽不厭！而我第一張買的黑膠碟卻是譚詠麟先生的《牆上的俏像》(你話幾咁衝突呢，哈！)。泥紅帶啡的磚牆下校長穿上深啡色飛機師皮褸加埋個chock樣很有型，碟內一首《編織》更是我全碟最愛。當年我拿著這張剛買的黑膠到幼稚園接細佬放學，他的班主任看見我拿著譚詠麟的黑膠碟即時以九秒七九的速度奔出班房對我說：我都買咗呀，好正㗎！(想當年音樂工業蓬勃，歌手出唱片賣十零廿萬閒閒地啦！依家，賣過萬都開香檳擺慶恭喇，真係…唉！)到十六七歲開始跟啲friend去浦鬼佬吧(崇洋心態從那時萌芽，跟鬼佬傾計學英文扮鬼仔但其實好多時嘅對答都係yeah, right, ok, cool再加亂用IS, MY, ARE...但當時的確以為自己好有型，有鬼佬朋友，又喺鬼佬吧飲happy hour…哈哈哈哈！)我們一幫人每次都會趕住在happy hour前狂點多兩杯生啤，希望用最平嘅價錢得到最high嘅效果。跟住就“老逢”“籌期”一人一兩蚊籌夠十蚊就可以在吧內的點唱機點歌(五蚊兩首，十蚊就有四首)。朋友GLENN通常會搶爭點第一首，好彩佢爭驘我先有機會接觸到改變我一生的他們-THE DOORS的名曲LIGHT MY FIRE。搶耳的琴前奏配上JIM MORRISON性感又狂野的演譯，直情令自以為聽好多歌嘅我(其實只係聽好多廣東流行曲！)如夢初醒！心諗乜啲英文歌咁好聽嘅！多謝好友GLENN的熱情推介，從此THE DOORS就將我由廣東流行曲帶進西方搖滾殿堂。後來更發現Jim morrison跟我都是十二月八號出生的，所以每年我生日都會在家播放這首影響我一生的LIGHT MY FIRE!COME ON BABY LIGHT MY FIRE, COME ON BABY LIGHT MY FIRE, TRY TO SET THE LIGHT ON FIRE...!MAY GOD TAKE GOOD CARE OF JIM MORRISON.