東京開工之旅!!

我杜如風返嚟啦!!!!!其實我返咗嚟香港差唔多成個禮拜架啦,不過病足咁耐,所以一路無update過個blog同大家打聲招呼,唔好意思!其實我都好耐未試過去完日本開工返嚟之後抖咗咁耐都回唔到氣!全因比啲天氣搞到我暈底!!首先頭幾日喺東京就熱到飛起,有成20度,點知緊接嗰幾日要去雪地開工做翻譯就突然遇上大風雪,得返零下5度!一熱一凍,已經作病,但要做嘢,焗住頂硬上!一返到嚟香港諗住抖返夠本,點知香港又突然又熱又濕!一乾一濕,仲病多幾錢重!!總之呢2個禮拜我就不停比啲天氣玩到謝晒!!無晒能量!!不過大家放心,到我今天終於提得起勁寫blog,已經好快返8899啦!!

好啦,近况交待完,講返日本工作之旅!今趟又係純悴帶隊做翻譯,唔洗化妝唔洗度稿,邊玩邊做,快錢是也!不過長期喺大風雪底下拍攝,查實都幾痛苦!!

大隊揸車駛往大風雪拍攝場地,我嘅主要責任係---人肉導航!! (不過我係一個非常失職嘅導航,成日兜錯路! hahhaa...)大家都知我拍咗咁耐「流行東京」都係無車坐架啦,其實我同呢個GPRS真係唔friend架!!! sorry sorry....敬請原諒!!

安全到達嘞!好凍,不過好靚!

開工大吉!!今次麻麻地大吉....大雪多啲!!! (見唔見到成隊crew喺我副goggles裏面呀?!)

我嘅super model---可口可樂!!!無錯,就算唔記得帶銀包、帶手提出街,我都唔會唔記得帶枝可樂跟身架!! heeheehee....

其實....我真係好恨做可樂代言人架!!! (無錢都劑架! 有免費可樂飲就得嘞! heehee...)

好艱辛嘅攝製隊!! (好似拍緊「人在他鄉」咁!)

更艱辛嘅狗仔隊!!! hahahhaa... 講笑啫,呢位係「疑似狗仔隊」嘅攝製隊工作人員嚟架!!

拍攝工作順利完畢,成crew人出返東京大掃貨獎勵自己!我亦即時變返「流行東京」主持人嘅身份...「即係跟我嚟流行東京!!」hahaha...點知遇上一件靈異怪事----高島屋TIMESQUARE竟然休息無開!!!我拍咗咁耐節目從來都未見佢「定休日」過!!簡直恐佈!!啲Yen... 實在太貴啦!!! 有排你驚~~~

沿途見到佢~~~~!!! heeheehee..... Lucky lucky!!

仲有一直都好欣賞好鐘意嘅---「温室內美麗」汽水機!! 好索呀! haha...Coke Zero代言人!我又要!!!

繼續殺落原宿,當然要返Mercibeaucoup啦!! (我開始懷疑我係喺呢度做part time架......)

唔好問我點解剪到個頭咁短,想做就去做啦!我髮型師話嘅!!幾cute吖!成個IQ博士裏面嗰個草菇咁!起碼我老豆同媽咪無再鬧我,仲好鐘意添!因為佢地認為我變返3歲嘅杜如風咁樣!! heehee...

好嘞,成份糧又比返晒佢嘞!! (雙倍....起碼!)

裏原宿某店鋪內-----我似唔似周杰倫啲唱片封套呀??!! heehee....

個人認為只可以喺日本先可以戴出街嘅心愛Martin Margiela太陽眼鏡!! 似唔似拍緊第一輯「流行東京」尾二嗰集打格仔嗰場呀?!以後再要拍打格仔嘅嘢就可以慳返好多做後期嘅製作功夫嘞!! hahaha....

南青山Loveless嘅Snoopy燈!好cute又好型!!

戰利品!!最後...話唔買唔買,又買凸啦!!!日本嘅經濟本來都好差,我去完一轉之後---好返晒啦!!! 唉....仇人定朋友呢?! 「難為正邪定分界~~~」!!

最後喺成田機場「咩」住呢個新買嘅超得意R2D2背囊上飛機!! heehee...連個地勤叔叔都忍唔住同我講:「Final call嘅時候我會喺廣播度叫R2D2上機架啦!」跟住我就好囂張咁同佢地講:「呢個...只不過係我個 Laptop case嚟架啫!!」 haha...(至於喺邊度買,請大家留意將會喺我死之前出版嘅「風行東京2」!!裏面會詳細介紹架嘞,喺度賣個關子先!heehee...) 至於呢位好似同我情侶裝咁劑嘅「疑似男朋友」,大家千祈唔好誤會!!其實佢係今次攝製隊嘅其中一位重要主腦!不過佢份人查實極度低B,而且應該非常沈迷睇「流行東京」....因為基本上全程我買乜,佢都跟住買!非常信任在下嘅taste!!明智明智!

日本開工之旅報告完畢。至於究竟我嘅情人節喺日本點過呢??!!請大家留意下回分解!!!東京之旅----待續....

呢個星期我大部份時間都留喺屋企休養,睇咗「葉問」,睇完之後個心有啲唔舒服,因為覺得自己有啲似戲裏面嘅林家棟,一直靠識日文去賺緊中國人嘅錢!!諗深一層,好似唔係好啱....「我唔係漢奸!我只不過係一個中國人!!」於是我最近不斷自己練詠春嚟發洩,可憐身邊嘅朋友全部變晒我嘅木人庄!! hahaha...佢地真係....「葉問葉傷心」嘞!!! hahahhahaa......